ଭୁବନେଶ୍ୱର: ବିଜୁ ଜନତା ଦଳର ନେତା ଭିକେ ପାଣ୍ଡିଆନ ବିଜେପି ସହ ସମ୍ଭାବ୍ୟ ମେଣ୍ଟକୁ ନେଇ ଚର୍ଚ୍ଚାକୁ ଏକ ନୂଆ ଦୃଷ୍ଟିକୋଣକୁ ଆଣିଛନ୍ତି। ମେଣ୍ଟ ରାଜନୀତିକୁ ଅତିକ୍ରମ କରି ବୃହତସ୍ବାର୍ଥର କଥା କହି ଉଭୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୋସ୍ତିକୁ ଗୁରୁତ୍ୱାରୋପ କରିଛନ୍ତି।
ଓଡ଼ିଶାର ଶାସକ ଦଳ ଓ ମୁଖ୍ୟ ବିରୋଧୀ ଦଳ ମଧ୍ୟରେ ସମ୍ଭାବ୍ୟ ମେଣ୍ଟର ରାଜନୈତିକ ପ୍ରଭାବ ଉପରେ ପାଣ୍ଡିଆନ୍ ପ୍ରତିକ୍ରିୟା ରଖିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ରମାଗତ ଭାବେ ରାଜ୍ୟରେ ୩/୪ତମ ସଂଖ୍ୟାଗରିଷ୍ଠତା ହାସଲ କରିଛନ୍ତି। ସେହିପରି ୨୦୨୨ ପଂଚାୟତ ନିର୍ବାଚନରେ ଦଳୀୟ ଚିହ୍ନରେ ପ୍ରତିଦ୍ୱନ୍ଦ୍ୱିତା ହେଉଥିବା ବେଳେ ବିଜେଡି ୯୦ ପ୍ରତିଶତ ଆସନରେ ବିଜୟୀ ହୋଇଥିଲା । କ୍ଷମତା ବଜାୟ ରଖିବା ଓ ଲୋକଙ୍କ ସେବା କରିବା ପାଇଁ ନବୀନଙ୍କର ମେଣ୍ଟର ଆବଶ୍ୟକତା ନାହିଁ ବୋଲି ସେ କହିଛନ୍ତି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ସର୍ଭେରେ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ଏନଡିଏକୁ କ୍ରମାଗତ ତୃତୀୟ ବିଜୟ ମିଳିବ ବୋଲି ଆକଳନ କରିଛନ୍ତି।
ପାଣ୍ଡିଆନ ସମ୍ଭାବ୍ୟ ମେଣ୍ଟକୁ ‘ଅନନ୍ୟ ଉଦାହରଣ’ ବୋଲି ବର୍ଣ୍ଣନା କରିଛନ୍ତି। ସେ ବିଶ୍ୱାସ କରନ୍ତି ଯେ ଏହା ଏକ ବୃହତ ଉଦ୍ଦେଶ୍ୟ ପାଇଁ ଏକାଠି ହେବା ପାଇଁ ଦୁଇ ଲୋକପ୍ରିୟ ନେତାଙ୍କ ପ୍ରୟାସକୁ ପ୍ରତିନିଧିତ୍ୱ କରେ। ବିଜେପି କିମ୍ବା ବିଜେଡି ପାଇଁ ଏହି ମେଣ୍ଟର କୌଣସି ନିର୍ବାଚନୀ ମହତ୍ତ୍ୱ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ବରଂ ଏହା ଦୁଇ ଜଣଙ୍କ ମଧ୍ୟରେ ଏକ ଦୃଢ଼ ବନ୍ଧୁତାର ପ୍ରତୀକ।
ରାଜ୍ୟରେ ସରକାର ଗଢ଼ିବା ପାଇଁ ବିଜେଡି ବିଜେପି ଉପରେ ନିର୍ଭର କରେ ନାହିଁ ଏବଂ କେନ୍ଦ୍ରରେ ବିଜେପି ଉପରେ ମଧ୍ୟ ଏହା ଲାଗୁ ହେବ। ମେଣ୍ଟର ସାମ୍ପ୍ରତିକ ସ୍ଥିତି ସମ୍ପର୍କରେ ଜାତୀୟ ଗଣମାଧ୍ୟମ ନ୍ୟୁଜ 18ର କନକ୍ଲେଭରେ ଯୋଗ ଦେଇ ଏପରି କିଛି କହିଛନ୍ତି। ଯାହା ରାଜ୍ୟ ରାଜନୀତିରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
