ବେଙ୍ଗାଲୁରୁ: ଅଦିନିଆ ବର୍ଷାରେ ବେହାଲ ବେଙ୍ଗାଲୁରୁ । ଚାରିଆଡେ ପାଣି ପାଣି ଆଉ ପାଣି । ପ୍ରବଳ ବର୍ଷା ଫଳରେ ବେଙ୍ଗାଲୁରୁରେ ଅଦିନିଆ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଗତ ରବିବାର ରାତିରୁ ବର୍ଷା ଢାଳୁଛି ଯେ ଢାଳୁଛି । ଦୀର୍ଘ ୨ ଦିନ ଧରି ଲଗାଣ ବର୍ଷା କାରଣରୁ ବୁଡିଛି ସହର, ବେହାଲ ହୋଇଛି ବେଙ୍ଗାଲୁରୁ । ସ୍ଥାନେ ସ୍ଥାନେ ଜମିଛି ବର୍ଷା ପାଣି, ରାସ୍ତା ନଦୀ ପରି ଲାଗୁଛି । କର୍ଣ୍ଣାଟକର ଉପକୂଳବର୍ତ୍ତୀ ଅଞ୍ଚଳରେ ପ୍ରବଳ ବର୍ଷା ପାଇଁ ପାଣିପାଗ ବିଭାଗ ୟେଲୋ ଆଲର୍ଟ ଜାରି କରିଛି। ସେହିପରି, କର୍ଣ୍ଣାଟକର ଦକ୍ଷିଣ ଆଭ୍ୟନ୍ତରୀଣ ଅଞ୍ଚଳରେ ପ୍ରବଳ ବର୍ଷା ପାଇଁ ଅରେଞ୍ଜ ଆଲର୍ଟ ଜାରି କରାଯାଇଛି।
ଗତ ୪୮ ଘଣ୍ଟା ମଧ୍ୟରେ ପ୍ରବଳ ବର୍ଷା ଭାରତର ପ୍ରମୁଖ ସହର ମଧ୍ୟରୁ ଗୋଟିଏ ବେଙ୍ଗାଲୁରୁରେ ଅରାଜକତାକୁ ପ୍ରକାଶ କରିଛି। ବେଙ୍ଗାଲୁରୁର ଅନେକ ସ୍ଥାନରେ ପାଣି ଜମି ରହିଛି ଏବଂ ଅନେକ ଘରେ ପାଣି ପଶିଛି, ଯାହା ଫଳରେ ସାଧାରଣ ଜୀବନଯାତ୍ରା ଗୁରୁତର ଭାବରେ ପ୍ରଭାବିତ ହୋଇଛି। ପ୍ରବଳ ବର୍ଷା ଯୋଗୁଁ ଅନେକ ଗଛ ଉପୁଡ଼ି ଯାନବାହାନ ଉପରେ ପଡ଼ିଛି। ଅନେକ ସ୍ଥାନରେ ପାଣି ଜମି ରହିଛି। ଭାରୀ ଯାତାୟାତ ପାଇଁ ପୂର୍ବରୁ କୁଖ୍ୟାତ, ବେଙ୍ଗାଲୁରୁ ଜଳବନ୍ଦୀ ଯୋଗୁଁ ଆହୁରି ସମସ୍ୟାର ସମ୍ମୁଖୀନ ହେଉଛି। ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଆଗାମୀ ଦୁଇ ଦିନ ବେଙ୍ଗାଲୁରୁ ଏବଂ ଏହାର ଆଖାପାଖ ଅଞ୍ଚଳରେ ପ୍ରବଳ ବର୍ଷା ହେବାର ଆଶଙ୍କା ରହିଛି।
HSR ଲେଆଟଉଟ, ସିଲ୍କ ବୋର୍ଡ, କୋରମଙ୍ଗଳା, କେ ଆର ପୁରମ ସମେତ ବିଭିନ୍ନ ସ୍ଥାନରେ ବୁଡ଼ି ରହିଛି ରାସ୍ତାଘାଟ । ବର୍ଷାଜନିତ ମୃତ୍ୟୁ ସଂଖ୍ୟା ୫ ରେ ପହଞ୍ଚିଲାଣି । ଶହଶହ ଘର ଜଳବନ୍ଦୀ । ୨୦ରୁ ଊର୍ଦ୍ଧ୍ବ ହ୍ରଦରେ ବନ୍ୟା ସୃଷ୍ଟି ହୋଇଛି । ଜଳବନ୍ଦୀ ଲୋକଙ୍କୁ ଉଦ୍ଧାର ପାଇଁ ପହଞ୍ଚିଛନ୍ତି ଏନଡିଆରଏଫ ଟିମ । ଦକ୍ଷିଣ ପୂର୍ବ ବେଙ୍ଗାଲୁରୁର ଏକ ଆପାର୍ଟମେଣ୍ଟ କମ୍ପ୍ଲେକ୍ସରେ ପାଣି ନିଷ୍କାସନ କରିବା ସମୟରେ ଦୁଇ ଜଣଙ୍କର ମୃତ୍ୟୁ ଘଟିଥିବାବେଳେ ସକାଳେ ଜଣେ ମହିଳାଙ୍କର ଜୀବନ ଚାଲିଯାଇଛି । ଫଳରେ ମୃତକଙ୍କ ସଂଖ୍ୟା ୩ରେ ପହଞ୍ଚିଛି । ମୃତକମାନେ ହେଉଛନ୍ତି ମନମୋହନ କାମଥ (୬୩) ଏବଂ ଦିନେଶ (୧୨), ଶଶିକଳା(୩୫) । ଉଭୟ ମାମଲାରେ ଅପମୃତ୍ୟୁ ମାମଲା ରୁଜୁ କରାଯାଇଥିବା ଜଣେ ପୋଲିସ ଅଧିକାରୀ କହିଛନ୍ତି ।
