ନୂଆଦିଲ୍ଲୀ: ବଲିଉଡ ଅଭିନେତା ସଞ୍ଜୟ ଦତ୍ତ ଦେଶର ସବୁଠାରୁ ବଡ ଟିକସଦାତାମାନଙ୍କ ମଧ୍ୟରେ ଗୋଟିଏ । ତାଙ୍କ ପରିବାରର ପ୍ରାୟତଃ ସଦସ୍ୟ ରାଜନୀତିର ଏକ ଅଂଶ । ଆସନ୍ତା ଲୋକସଭା ନିର୍ବାଚନ ପାଇଁ କଂଗ୍ରେସ ତାଙ୍କୁ ହରିୟାଣାର କର୍ଣ୍ଣଲ ଆସନରୁ ଟିକେଟ ଦେବା ନେଇ ଚର୍ଚ୍ଚା ଜୋର ଧରିଥିଲା । କିନ୍ତୁ ସଞ୍ଜୟ ଦତ୍ତ ଏହାକୁ ଗୁଜବ ବୋଲି କହିବା ସହ ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ ବୋଲି ସ୍ପଷ୍ଟ କରିଛନ୍ତି । ସଞ୍ଜୟ ଦତ୍ତଙ୍କ ମୋଟ ସମ୍ପତ୍ତି ୩୦୦ କୋଟିରୁ ଅଧିକ । ତାଙ୍କ ପିତା ଏବଂ ଭଉଣୀ ବର୍ତ୍ତମାନ ରାଜନୀତିରେ ସକ୍ରିୟ ଅଛନ୍ତି । ତେବେ ବର୍ତ୍ତମାନ ରାଜନୀତିରେ ଏଣ୍ଟ୍ରି କରିବା କୌଣସି ଯୋଜନା ନାହିଁ ବୋଲି କହିଛନ୍ତି ସଞ୍ଜୟ ।
ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ହରିୟାଣାର କର୍ଣ୍ଣଲ ଲୋକସଭା ଆସନରୁ ନିର୍ବାଚନ ଲଢିବେ । କିଛି ଦିନ ତଳେ କଂଗ୍ରେସ ଏହି ଆସନରୁ ଅଭିନେତା ସଞ୍ଜୟ ଦତ୍ତଙ୍କୁ ଟିକେଟ୍ ଦେବ ବୋଲି ଚର୍ଚ୍ଚା ଜୋର ଧରିଥିଲା । ଏପରିକି ତାଙ୍କ ନାମ ଚୂଡ଼ାନ୍ତ ହୋଇଛି ବୋଲି ମଧ୍ୟ କୁହାଯାଇଥିଲା । ତେବେ ସଞ୍ଜୟ ଦତ୍ତ ଏନେଇ ସ୍ପଷ୍ଟ ଭାବରେ କହିଛନ୍ତି ଯେ, “ରାଜନୀତିରେ ମୋର ସାମିଲ ହେବାକୁ ନେଇ ଯେଉଁ ଚର୍ଚ୍ଚା ହେଉଛି ତାହାକୁ ଶେଷ କରିବାକୁ ଚାହେଁ ମୁଁ । ମୁଁ କୌଣସି ରାଜନୈତିକ ଦଳରେ ଯୋଗ ଦେଉ ନାହିଁ କି ନିର୍ବାଚନରେ ମଧ୍ୟ ପ୍ରତିଦ୍ୱନ୍ଦ୍ୱିତା କରୁନାହିଁ। ଯଦି ମୁଁ କେବେ ରାଜନୀତିରେ ଯୋଗଦେବାର ନିଷ୍ପତି ନେବି ତେବେ ସର୍ବପ୍ରଥମେ ଆପଣମାନଙ୍କୁ ଜଣେଇବି । ମୋର ରାଜନୀତିରେ ଏଣ୍ଟ୍ରି ନେଇ ଯେଉଁ ଚର୍ଚ୍ଚା ହେଉଛି ତାହା ସମ୍ପୁର୍ଣ୍ଣ ଭାବରେ ଗୁଜବ ।
ସୂଚନାଯୋଗ୍ୟ ଯେ, ରାଜନୀତି ସହିତ ସଞ୍ଜୟ ଦତ୍ତଙ୍କର ପୁରୁଣା ସମ୍ପର୍କ ରହିଛି । ତାଙ୍କ ପିତା ମନମୋହନ ଜଣେ ମନ୍ତ୍ରୀ ଥିଲେ ଏବଂ ତାଙ୍କ ଭଉଣୀ ପ୍ରିୟା ଦତ୍ତ ମଧ୍ୟ ଜଣେ ସାଂସଦ ଥିଲେ । ଅଭୟ ସିଂ ଚୌଟାଲାଙ୍କ ପାଇଁ ପ୍ରଚାର କରିବାକୁ ସଞ୍ଜୟ ଦତ୍ତ ନିଜେ ହରିୟାଣାକୁ ଅନେକ ଥର ଆସିଛନ୍ତି । ସଞ୍ଜୟ ଦତ୍ତଙ୍କ ପୈତୃକ ଘର ହରିୟାଣାର ଯମୁନାନଗରରେ । ରିପୋର୍ଟ ଅନୁଯାୟୀ, ସଞ୍ଜୟ ଦତ୍ତଙ୍କ ମୋଟ ସମ୍ପତ୍ତି ୩୦୦ କୋଟିରୁ ଅଧିକ । ସେ ଦେଶର ବୃହତ୍ତମ ବ୍ୟକ୍ତିଗତ ଆୟକରଦାତାମାନଙ୍କ ମଧ୍ୟରେ ମଧ୍ୟ ଗଣିତ । ସଞ୍ଜୟଙ୍କ ମାସିକ ଆୟ 1କୋଟିରୁ ଅଧିକ । ସେହି ଅନୁସାରେ ତାଙ୍କ ବାର୍ଷିକ ଆୟ ୧୨ କୋଟିରୁ ଅଧିକ ଅଟେ । ଚଳଚ୍ଚିତ୍ରରେ କାମ କରିବା ବ୍ୟତୀତ ସଞ୍ଜୟଙ୍କର ନିଜସ୍ଵ ପ୍ରଡକ୍ସନ୍ ହାଉସ୍ ମଧ୍ୟ ଅଛି ।
