ଭୁବନେଶ୍ଵର: ଟ୍ଵିନ ସିଟିରେ କାଳବୈଶାଖୀର ତାଣ୍ଡବ । ସକାଳୁ ସକାଳୁ ହଠାତ୍ ବଦଳିଗଲା ପାଗର ମିଜାଜ୍ । ଘୋଟିଆସିଲା କଳାହାଣ୍ଡିଆ ମେଘ । ବର୍ଷାରେ ଭିଜିଲା ଟ୍ଵିନସିଟି ଭୁବନେଶ୍ବର-କଟକ । କାଳବୈଶାଖୀ ପ୍ରଭାବରେ ହେଉଛି ପ୍ରବଳ ବର୍ଷା ସାଙ୍ଗକୁ ପବନ । ପରିସ୍ଥିତି ଏପରି ହୋଇଛି କି ରାସ୍ତାରେ ଗାଡ଼ିର ଲାଇଟ୍ ଦେଇ ଲୋକଙ୍କୁ ଯାତ୍ରା କରିବାକୁ ପଡ଼ିଛି।
ବର୍ତ୍ତମାନ ରାଜ୍ୟ ଉପରେ ୨ଚି ଟ୍ରପ୍ ଲାଇନ୍ ବା ନିମ୍ନ ଚାପରେଖା ସକ୍ରିୟ ରହିଛି। ଫଳରେ ବର୍ଷା ହେଉଛି। ଆଗାମୀ ୩ ଦିନ ହାଲୁକାରୁ ମଧ୍ୟମ ଧରଣର ବର୍ଷା ଅଧିକାଂଶ ସ୍ଥାନରେ ହେବାର ସମ୍ଭାବନା ଥିବା ବେଳେ ୩ ଦିନ ପରେ ୨ ରୁ ୩ ଡିଗ୍ରୀ ତାପମାତ୍ରା ବଢିବ। ପୁଣି ରାଜ୍ୟରେ ଅସହ୍ୟ ତାତି ଅନୁଭୂତ ହେବ। ଆଜି ବିଶେଷକରି, ବାଲେଶ୍ବର, ଭଦ୍ରକ, ମୟୂରଭଂଜ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର,ପୁରୀ, ଖୋର୍ଦ୍ଧା, ନୟାଗଡ, ଗଂଜାମ, ଗଜପତି, ରାୟଗଡା, ମାଲକାନଗିରି ଓ କୋରାପୁଟ୍ ଜିଲ୍ଲାରେ ବିଜୁଳି ଘଡଘଡି ସହ ପ୍ରବଳ ବର୍ଷା ହେବା ନେଇ ୟେଲୋ ଆଲର୍ଟ ଜାରି ହୋଇଛି। ଏହିସବୁ ଜିଲ୍ଲା ଗୁଡିକରେ ୩୦ ରୁ ୫୦ କିମି ବେଗରେ ପବନ ବହିବା ନେଇ ସତର୍କତା ଜାରି ହୋଇଛି। ୨୨ ରୁ ପାଗ ଶୁଖିଲା ରହିବ। ପରେ ଦିନ ତାପମାତ୍ରା ୩ ଡିଗ୍ରୀ ବଢିବ ବୋଲି ଆଞ୍ଚଳିକ ପାଣିପାଗ ନିର୍ଦ୍ଦେଶିକା ସୂଚନା ଦେଇଛନ୍ତି।