ନୂଆଦିଲ୍ଲୀ: ସାଧାରଣତଃ ନିଜ କର୍ମମୟ ଜୀବନ ଭିତରୁ କିଛି ସମୟ ପାଇଁ ବାହାରି ଲୋକେ ବୁଲାବୁଲି କରିବାକୁ ଯାଇଥାନ୍ତି । ଆଉ ସେତେବେଳେ ଘରେ ତିଆରି ଖାଦ୍ୟ ନୁହେଁ ବରଂ କିଛି ବାହାର ଖାଦ୍ୟ କାଇବାକୁ ଲୋକେ ବେଶି ଭଲପାଆନ୍ତି । ତେବେ ଯଦି ଆପଣ ଖାଦ୍ୟ ଖାଇବାକୁ କୌଣସି ଏକ ରେସ୍ତୋରାଂକୁ ଯାଇଥିବେ ଆଉ ସେଠାରେ ଆପଣଙ୍କୁ ହାତୀ ମଳରୁ ତିଆରି ମିଠା, କଞ୍ଚା ପତ୍ର ଖାଇବାକୁ ଦିଆଯିବ ତେବେ ସେତେବଳେ ଆପଣ କଣ କରିବେ ? ଆଜ୍ଞା ହଁ, ବାସ୍ତବରେ ଏପରି ଏକ ରେସ୍ତୋରାଂ ଅଛି ଯାହାକୁ ଏହିପରି ଖାଦ୍ୟ ପାଇଁ ରେକର୍ଡ ସୃଷ୍ଟି କରିଛି । ଏବଂ ଲୋକେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ସେହି ରେସ୍ତୋରାଂକୁ ଖାଇବାକୁ ମଧ୍ୟ ଯାଉଛନ୍ତି । ଚୀନର ସାଂଘାଇରେ ଏପରି ଏକ ରେସ୍ତୋରାଁ ଅଛି ଯାହାକି ତାର ଖାଦ୍ୟର ସ୍ୱାଦ ପାଇଁ ବରଂ ଖାଦ୍ୟ ପ୍ରସ୍ତୁତି କରିବାର ଶୈଳୀ ପାଇଁ ସାରା ବିଶ୍ଵରେ ପ୍ରସିଦ୍ଧ । ଏଠାକୁ ଲୋକେ କେବଳ ଖାଦ୍ୟ ଖାଇ ପେଟ ଭର୍ତ୍ତି କରିବାକୁ ନୁହେଁ ବରଂ ଭିନ୍ନ ଅନୁଭୂତି ପାଇଁ ଆସିଥାନ୍ତି । ଏଠାରେ ବିକ୍ରି ହେଉଥିବା ବ୍ୟଞ୍ଜନର କିଛି କାହାଣୀ ମଧ୍ୟ ରହିଛି। ତେବେ ନିକଟରେ ଏହି ରେସ୍ତୋରାଁ ନିଜ ଖାଦ୍ୟ ତାଲିକାରେ ହାତୀ ମଳରୁ ପ୍ରସ୍ତୁତ ମିଠା ସାମିଲ କରିଛି। ଆଉ ଏହି ମିଠା ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି ।
ବାସ୍ତବରେ ଏହି ରେସ୍ତୋରାଁ ରେନ୍ ଫରେଷ୍ଟର ଥିମ୍ ଉପରେ ଆଧାରିତ । ଅର୍ଥାତ୍ ଏହାର ଅଧିକାଂଶ ଖାଦ୍ୟ ଜଙ୍ଗଲ, ଜୀବଜନ୍ତୁ ଓ ପ୍ରକୃତି ସହ ଜଡିତ। ରେସ୍ତୋରାଁର ଏହି ଥିମ୍ କେବଳ ସାଜସଜ୍ଜା କିମ୍ବା ଖାଦ୍ୟର ନାମ ପର୍ଯ୍ୟନ୍ତ ସୀମିତ ନାହିଁ, ଏଠାକାର ଅଭିଜ୍ଞତା ଅନ୍ୟ ରେସ୍ତୋରାଁ ଠାରୁ ମଧ୍ୟ ଭିନ୍ନ । ଖାଦ୍ୟ ଖାଇବା ପୂର୍ବରୁ ଅତିଥିଙ୍କୁ ଏକ ଛୋଟ କୁଣ୍ଡରୁ ପତ୍ର ତୋଳିବାକୁ ପଡେ। ଏହାକୁ ସସ୍ରେ ବୁଡାଇ କଞ୍ଚା ଖାଇବାକୁ ପଡେ । ଏହାପରେ ବରଫ ଖଣ୍ଡରେ ମହୁ ଓ ଫୁଲ ରସରେ ଖାଇବାର ଏକ ପରମ୍ପରା ମଧ୍ୟ ରହିଛି । ମାତ୍ର ଏସବୁ ଭିତରେ ସବୁଠାରୁ ଆକର୍ଷଣୀୟ ଥିଲା ହାତୀ ମଳରୁ ତିଆରି ମିଠା । ହାତୀର ମଳକୁ ସଫା କରାଯାଇ ଏଥିରେ ଏକ ପ୍ରକାରର ଫୁଲର ରସ, ମହୁ ସହ ଅନ୍ୟାନ୍ୟ ଜିନିଷ ମିଶାଯାଏ । ପ୍ରଥମେ ମଳକୁ ଭଲ ଭାବରେ ସଫା କରାଯାଏ ଏବଂ ଏଥିରୁ ତନ୍ତୁ ବାହାର କରାଯାଏ, ଯାହା ସାଧାରଣତଃ କାଗଜ ତିଆରି କରିବା ପାଇଁ ବ୍ୟବହୃତ ହୁଏ। ତା’ପରେ ଏହାକୁ ଫୁଟାଇ ଜୀବାଣୁମୁକ୍ତ କରାଯାଏ ଏବଂ ଏହି ମିଠା ପାଇଁ ବ୍ୟବହାର କରାଯାଏ।
ତେବେ ରେସ୍ତୋରାଁର କହିବା ଅନୁସାରେ, ଏହି ପ୍ରକ୍ରିୟାଟି ସମ୍ପୁର୍ଣ୍ଣ ନିରାପଦ ଏବଂ ଖାଦ୍ୟଯୋଗ୍ୟ । ଏହି ମିଠାଟି ଖାଇବାକୁ ହେଲେ ଅତିଥିମାନଙ୍କୁ ପ୍ରଥମେ ଏକ ଛୋଟ ସିଡ଼ି ଚଢ଼ିବାକୁ ପଡିବ। ଉପରେ, ସେମାନେ ନିଜ ପସନ୍ଦର ସୁଗନ୍ଧ ଏବଂ ସ୍ୱାଦ ବାଛିବେ, ଯାହାକୁ ପରେ ସେମାନଙ୍କ ମିଠାରେ ମିଶାଯାଏ। ଏହାର ଅର୍ଥ ହେଉଛି ପ୍ରତ୍ୟେକ ମିଠା ବହୁତ ସ୍ୱତନ୍ତ୍ର ଏବଂ ଭିନ୍ନ। ଏହି ରେସ୍ତୋରାଁରେ ୩,୮୮୮ ୟୁଆନ (୪୫,୯୦୦ ଟଙ୍କା) ମୂଲ୍ୟରେ ୧୫-କୋର୍ସ ଭୋଜନ ପ୍ରଦାନ କରାଯାଏ।
