ମୁମ୍ବାଇ: ଅଧିକାଂଶ ସମୟରେ କାହାଣୀ ଓ ଚରିତ୍ରକୁ ନେଇ ପରୀକ୍ଷାନିରୀକ୍ଷା କରିଥାଆନ୍ତି ଅମୀର୍ ଖାନ୍। ସଂପ୍ରତି ନିଜର ନୂଆ ଚଳଚ୍ଚିତ୍ରରେ ୧୦ଜଣ ନବାଗତଙ୍କୁ ପରଦାକୁ ଆଣିବା ନେଇ ଚର୍ଚ୍ଚାରେ ଅଛନ୍ତି ପରଫେକ୍ସନିଷ୍ଟ୍ ଅମୀର୍। ବ୍ୟବସାୟ ଦୃଷ୍ଟିରୁ ନିର୍ଦ୍ଦେଶକମାନେ ନିଜ ଫିଲ୍ମରେ ଷ୍ଟାର୍କିଡ୍ଙ୍କୁ ସୁଯୋଗ ଦେଉଥିବା ବେଳେ ଅମୀର୍ କିନ୍ତୁ ସିନେଶିଳ୍ପ ସହ ସଂପର୍କ ନଥିବା ୧୦ଜଣ ପ୍ରତିଭାବାନ୍ ଯୁବ କଳାକାରଙ୍କୁ ଲଞ୍ଚ୍ କରୁଛନ୍ତି। ଅମୀର୍ଙ୍କ ନୂଆ ଫିଲ୍ମ ‘ସିତାରେ ଜମିନ୍ ପର୍’ର ନିକଟରେ ଫାଷ୍ଟ୍ ଲୁକ୍ ରିଲିଜ୍ ହେବାପରେ ଏବେ ଫିଲ୍ମର ଟ୍ରେଲର ରିଲିଜ୍ ହୋଇଛି ।
ଭାରତ-ପାକିସ୍ତାନ ଉତ୍ତେଜନା ମଧ୍ୟରେ ଏହାର ଟ୍ରେଲରକୁ ସ୍ଥଗିତ ରଖାଯାଇଥିଲା । ଆମିର ଖାନଙ୍କ ପ୍ରଡକ୍ସନ୍ସ କିଛି ସମୟ ପୂର୍ବରୁ ଏକ ଭିଡିଓ ସେୟାର କରିଥିଲେ । ଯେଉଁଥିରେ ଆମିର ଖାନଙ୍କ ସହ ଏହି ଫିଲ୍ମରେ ଅନ୍ୟ କେଉଁମାନେ ନଜର ଆସିବେ ସେମାଙ୍କର ଏକ କଟଆଉଟ୍ ଅଛି । ଏହା ସହିତ, ଫିଲ୍ମର ଟ୍ରେଲର ପାଇଁ କୌଣସି ବଡ଼ ଇଭେଣ୍ଟ ଆୟୋଜନ କରାଯାଉ ନାହିଁ । ବରଂ ସମସ୍ତେ ଏକା ସମୟରେ ଫିଲ୍ମର ନୂଆ ଟ୍ରେଲରକୁ ଏକାଠି ଦେଖିପାରିବେ । ଆମିର ଖାନଙ୍କ ପ୍ରଡକ୍ସନ୍ସ ହାଉସରୁ ମିଳିଥିବା ସୂଚନା ଅନୁଯାୟୀ, ‘ସିତାରେ ଜମିନ୍ ପର’ର ଟ୍ରେଲର ୧୩ ମଇ ଅର୍ଥାତ୍ ଆଜି ରାତିରେ ରିଲିଜ୍ ହେବ । ଯାହା Zee ନେଟୱାର୍କ ଚ୍ୟାନେଲଗୁଡ଼ିକରେ ସନ୍ଧ୍ୟା ୭:୫୦ ରୁ ୮:୧୦ ପର୍ଯ୍ୟନ୍ତ ପ୍ରଦର୍ଶିତ ହେବ । ଫିଲ୍ମର ଟ୍ରେଲରଟି ରାତି ୮:୨୦ ସୁଦ୍ଧା ଆମିର ଖାନ ପ୍ରଡକ୍ସନର ସୋସିଆଲ ମିଡିଆ ହ୍ୟାଣ୍ଡେଲରେ ସେୟାର କରାଯିବ । ଆମିର ଖାନଙ୍କ ଫିଲ୍ମର ଟ୍ରେଲରକୁ ନେଇ ଦର୍ଶକମାନେ ବହୁତ ଉତ୍ସାହିତ ଥିବା ଜଣାପଡୁଛି ।
‘ଲାଲ ସିଂହ ଚଡ୍ଡା’ର ଫ୍ଲପ୍ ପରଠାରୁ ଅମିର ଖାନ ଫିଲ୍ମ ଦୁନିଆରୁ ଦୂରେଇ ରହିଥିଲେ । କିନ୍ତୁ ଏବେ ସେ ‘ସୀତାରେ ଜମିନ୍ ପର’ ଚଳଚ୍ଚିତ୍ର ଜରିଆରେ ନଜର ଆସିବେ । ତେବେ କହିରଖୁଛୁ ଯେ, ୨୦୦୭ ମସିହାରେ ରିଲିଜ ହୋଇଥିବା ‘ତାରେ ଜମିନ୍ ପର’ ର ଦ୍ଵିତୀୟ ଭାଗ ହେଉଛି ‘ସୀତାରେ ଜମିନ୍ ପର’ । ଯାହା ଜୁନ୍ ୨୦ରେ ରିଲିଜ ହେବାକୁ ଯାଉଛି । ଫିଲ୍ମର ପ୍ରଥମ ଭାଗ ସାରା ବିଶ୍ୱରୁ ୯୮.୫ କୋଟି ଟଙ୍କା ରୋଜଗାର କରିଥିଲା ଏବଂ ଏହା ସୁପରହିଟ୍ ହୋଇଥିଲା । ତେଣୁ ଦ୍ଵିତୀୟ ଭାଗ ମଧ୍ୟ ଭଲ ରୋଜଗାର କରିବ ବୋଲି ଆଶା ରଖିଛନ୍ତି ଫିଲ୍ମ ନିର୍ମାତା ।
