କେରଳ : କେରଳର ଏରନାକୁଲମ୍ ସ୍ଥାନରେ ଏକ ସମ୍ମିଳନୀ କେନ୍ଦ୍ରରେ ଏକ ବଡ଼ ଧରଣର ବିସ୍ଫୋରଣ ଆତଙ୍କ ସୃଷ୍ଟି କରିଛି। ଏହି ଆକ୍ରମଣରେ ଜଣଙ୍କର ମୃତ୍ୟୁ ନିଶ୍ଚିତ ହୋଇଛି। ଆହତଙ୍କ ସଂଖ୍ୟା 35 କୁ ବୃଦ୍ଧି ପାଇଛି। ୭ ଜଣ ବ୍ୟକ୍ତି ଆଇସିୟୁରେ ଚିକିତ୍ସିତ ହେଉଛନ୍ତି।
ପ୍ରାର୍ଥନା ସଭାରେ ହୋଇଥିବା ବିସ୍ଫୋରଣକୁ ଅତ୍ୟନ୍ତ ଦୁର୍ଭାଗ୍ୟଜନକ ଘଟଣା ବୋଲି କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ କହିଛନ୍ତି। ସେ କହିଛନ୍ତି ଯେ ଆମେ ଘଟଣା ସମ୍ପର୍କରେ ସବିଶେଷ ତଥ୍ୟ ସଂଗ୍ରହ କରୁଛୁ। ସମସ୍ତ ବରିଷ୍ଠ ଅଧିକାରୀ ଏର୍ନାକୁଲମରେ ଅଛନ୍ତି। ଡିଜିପି ଘଟଣାସ୍ଥଳକୁ ଯାଉଛନ୍ତି। ଆମେ ଏହାକୁ ବହୁତ ଗମ୍ଭୀରତାର ସହ ନେଉଛୁ l ମୁଁ ଡିଜିପିଙ୍କ ସହ କଥା ହୋଇଛି। ଅନୁସନ୍ଧାନ ପରେ ଆମକୁ ଅଧିକ ବିବରଣୀ ପାଇବା ଆବଶ୍ୟକ l
ଏହି ବିସ୍ଫୋରଣ ଘଟଣା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ ଙ୍କ ସହ କଥାବାର୍ତ୍ତା କରି ସମ୍ମିଳନୀ କେନ୍ଦ୍ରରେ ବୋମା ବିସ୍ଫୋରଣ ପରେ ରାଜ୍ୟର ପରିସ୍ଥିତି ସମ୍ପର୍କରେ ପଚାରି ବୁଝିଛନ୍ତି l ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିବାକୁ ସେ ଏନଆଇଏ ଏବଂ ଏନଏସଜିକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
କେରଳ ବିସ୍ଫୋରଣରେ ବିଜେପି ମୁଖପାତ୍ର ସୁଦର୍ଶନ ତ୍ରିବେଦୀ କହିଛନ୍ତି ଯେ “କଂଗ୍ରେସ ଦଳ ଅତ୍ୟନ୍ତ ବିପଜ୍ଜନକ ରାଜନୀତି କରୁଛି। ଏହା ହେଉଛି ପ୍ରେମର ଦୋକାନର ପ୍ରକୃତ ଚିତ୍ର l ଦେଶର ସୁରକ୍ଷା, ସମ୍ବେଦନଶୀଳତା ଏବଂ ସାମାଜିକ ସମନ୍ୱୟ ପାଇଁ ଏହା ବିପଜ୍ଜନକ ବୋଲି ସେ କହିଛନ୍ତି। ଆମ ସରକାର ଆସିବା ପୂର୍ବରୁ ଭାରତର କେଉଁ କୋଣରେ ବିସ୍ଫୋରଣ ଘଟି ନଥିଲା? ଉତ୍ତରରୁ ଦକ୍ଷିଣ, ଚଣ୍ଡିଗଡ଼ରୁ ଚେନ୍ନାଇ ଏବଂ ସୁରଟରୁ ଗୁଆହାଟୀ, ଲକ୍ଷ୍ନ ରୁ ଫୈଜାବାଦ, ଦିଲ୍ଲୀରୁ ମୁମ୍ବାଇ ପର୍ଯ୍ୟନ୍ତ ଆଜି ସବୁକିଛି ନିୟନ୍ତ୍ରିତ ହୋଇଛି, କିନ୍ତୁ ସେମାନେ ଏହି ଖର୍ଚ୍ଚରେ ମଧ୍ୟ ରାଜନୀତି କରିବାକୁ ପ୍ରସ୍ତୁତ ଅଛନ୍ତି। ଏହା ହେଉଛି ପ୍ରେମର ଦୋକାନର ପ୍ରକୃତ ଚିତ୍ର।”
କେରଳର ବିରୋଧୀଦଳ ନେତା ତଥା ରାଜ୍ୟ କଂଗ୍ରେସ ସଭାପତି ଭି.ଡି ସାଥେସନ କହିଛନ୍ତି, “ମୋତେ କୁହାଯାଇଥିଲା ଯେ ଦୁଇଟି ବିସ୍ଫୋରଣ ଓ ନିଆଁ ଲାଗିଥିଲା। ପ୍ରଥମେ ଏକ ବଡ଼ ବିସ୍ଫୋରଣ ହୋଇଥିଲା। ଦ୍ୱିତୀୟଟି ଏକ ଛୋଟ ବିସ୍ଫୋରଣ ଥିଲା। ଜଣେ ମହିଳାଙ୍କର ମୃତ୍ୟୁ ହୋଇଥିଲା ଏବଂ 25 ଜଣ ଡାକ୍ତରଖାନାରେ ଥିଲେ। “25 ଜଣଙ୍କ ମଧ୍ୟରୁ 6 ଜଣ ଆଇସିୟୁରେ ଅଛନ୍ତି। ସେତେବେଳେ ପ୍ରାୟ 2,000 ଲୋକ ଉପସ୍ଥିତ ଥିଲେ।“
କେରଳ ମନ୍ତ୍ରୀ ଭି.ଏନ୍ ଭାସାଭାନ୍ କହିଛନ୍ତି ଯେ ବିସ୍ଫୋରଣ ନୁହେଁ ଜଣେ ମହିଳା ଅଗ୍ନିକାଣ୍ଡରେ ମୃତ୍ୟୁ ବରଣ କରିଛନ୍ତି। ପ୍ରାରମ୍ଭିକ ବିଶ୍ଳେଷଣରେ କୁହାଯାଇଛି ଯେ ଲଗାତାର ଦୁଇଟି ବିସ୍ଫୋରଣ ହୋଇଥିଲା। ଜଣେ ବ୍ୟକ୍ତି ଡାକ୍ତରଖାନାରେ ଅଛନ୍ତି। 36 ଜଣ ଆହତ ହୋଇଛନ୍ତି, ସେମାନଙ୍କୁ ଭର୍ତ୍ତି କରାଯାଇଛି।