ନୂଆଦିଲ୍ଲୀ: ଭାରତରେ ସିସିଟିଭି କ୍ୟାମେରା ବିକ୍ରି କରୁଥିବା ଚୀନ କମ୍ପାନିଙ୍କ ଅଡ଼ୁଆ ବଢ଼ିବାକୁ ଯାଉଛି। ସିସିଟିଭି ଯୋଗାଣ ପ୍ରକ୍ରିୟାରୁ ଚୀନ କମ୍ପାନିଗୁଡ଼ିକୁ ବାଦ୍ ଦେବାପାଇଁ ଉଦ୍ୟମ ଆରମ୍ଭ ହୋଇଛି। ଏହି ପଦକ୍ଷେପ ଦ୍ବାରା ଭାରତରେ ସ୍ଥାନୀୟ କମ୍ପାନିଙ୍କ ଦ୍ବାରା ସିସିଟିଭି କ୍ୟାମେରା ଉତ୍ପାଦନ ବଢ଼ିବା ସମ୍ଭାବନା ରହିଛି। ଭାରତ ପାକିସ୍ତାନ ବିବାଦ ବେଳେ ଚୀନର ପାକିସ୍ତାନକୁ ସମର୍ଥନ ଏବେ ଚୀନ ପାଇଁ ସମସ୍ୟା ସୃଷ୍ଟି କରିଛି । ଗୋଟେ ପରେ ଗୋଟେ ପାକିସ୍ତାନ, ତୁର୍କୀ ଏବଂ ଚୀନର ଜିନିଷକୁ ବ୍ୟାନ କରିବାରେ ଲାଗିଛି ଭାରତ । ଆଉ ଏହାରି ଭିତରେ ଚୀନ ସିସିଟିଭିକୁ ନେଇ ଆସିଥିବା ଏହି ଖବର ଚାଇନା କମ୍ପାନୀ ମାନଙ୍କୁ ଦ୍ଵନ୍ଦରେ ପକାଇଛି ।
ଚୀନ ପ୍ରସ୍ତୁତ CCTV କ୍ୟାମେରା ବିକ୍ରି ଓ ବ୍ୟବହାର ଉପରେ ଲାଗିଲା ଅଙ୍କୁଶ । ବିକ୍ରି ପୂର୍ବରୁ ସରକାରୀ ଲ୍ୟାବ୍ରେ ଯାଞ୍ଚ ହେଲା ବାଧ୍ୟତାମୂଳକ । ହାର୍ଡୱେର, ସଫ୍ଟୱେର, ସୋର୍ସ କୋଡ୍ ସରକାରୀ ଲ୍ୟାବ୍ରେ ଯାଞ୍ଚ ହେବ । ଗତ ଏପ୍ରିଲ ୯ ତାରିଖ ପରେ ତିଆରି କିମ୍ବା ଆମଦାନୀ ସାମଗ୍ରୀ ପାଇଁ ଏହି ନିୟମ ଲାଗୁ ହୋଇଛି । ସବୁ CCTV ଡିଭାଇସ୍ ପାଇଁ କଟକଣା ଲାଗୁ ବୋଲି ସୂଚନା ଜାରି କରାଯାଇଛି । ଚୀନ ଏସବୁ ଡିଭାଇସ୍ ଦ୍ବାରା ଗୁପ୍ତଚରୀ କାର୍ଯ୍ୟ କରୁଥିବା ଆଶଙ୍କା ରହିଥିବାରୁ ଏପରି ନିଷ୍ପତ୍ତି ନିଆଯାଇଛି । ଚୀନ ପ୍ରସ୍ତୁତ ଶସ୍ତା CCTVର ବ୍ୟାପକତା ବିପଦର କାରଣ ହୋଇପାରେ ବୋଲି କହିଛନ୍ତି ସରକାର ।