ଭୁବନେଶ୍ଵର: ବିଭିନ୍ନ ମିଷ୍ଠାନ ମଧ୍ୟରୁ ରସାବଳୀ ଅନ୍ୟତମ ହୋଇଥିବାବେଳେ, ଏହା କେବଳ କେନ୍ଦ୍ରାପଡ଼ା ରେ ହିଁ ମିଳିଥାଏ । ୮ଶହ ବର୍ଷ ପୂର୍ବରୁ ରସାବଳୀ ପ୍ରଭୁ ବଳଦେବଜୀଉ ଙ୍କର ପ୍ରସାଦ ରୂପେ ଲାଗିଆସିଛି ବୋଲି ଇତିହାସ ରେ ଉଲ୍ଲେଖ ରହିଛି । ପ୍ରତିଦିନ ସନ୍ଧ୍ୟା ଆଳତୀ ପୂର୍ବରୁ ରସାବଳୀ ଶ୍ରୀ ବଳଦେବଜୀଉଙ୍କୁ ଭୋଗ ଲାଗି କରାଯାଇଥାଏ। ମରହଟ୍ଟା ଶାସନ ସମୟରେ ମହନ୍ତ ମାନେ ଶାସନ କରୁଥିବା ସମୟରେ ଷୋଡଗୋପି ରାମାନନ୍ଦ ଦାସ ଙ୍କ ତତ୍ଵାବଧାନ ରେ ୧୬୬୭ମସିହାରୁ ରସାବଳୀ ପ୍ରଭୁ ବଳଦେବଜୀଉଙ୍କର ଦୈନନ୍ଦିନ ପ୍ରସାଦ ରୂପରେ ପ୍ରଚଳିତ ହୋଇଆସୁଛି । ତେବେ ଆସନ୍ତୁ ଜାଣିବା ଘରେ କେମିତି ବନେଇବେ ଏହି ସ୍ଵାଦିଷ୍ଟ ରସାବଳୀ ।
ଆବଶ୍ୟକ ସାମଗ୍ରୀ
କ୍ଷୀର – ୧ ଲିଟର
ସୁଜି – ଆବଶ୍ୟକ ପରିମାଣରେ
ଘିଅ – ଆବଶ୍ୟକ ପରିମାଣରେ
ଲୁଣ – ଆବଶ୍ୟକ ପରିମାଣରେ
ଗୁଜୁରାତି ଗୁଣ୍ଡ – ୧ ଚାମଚ
କାଜୁ, ପେସ୍ତା ବାଦାମ, ବାଦାମ – ଆବଶ୍ୟକ ପରିମାଣରେ
ତେଲ – ଆବଶ୍ୟକ ପରିମାଣରେ
କେଶର – ଅଳ୍ପ
ଚିନି – ୨ କପରୁ ସାମାନ୍ୟ କମ
ପ୍ରସ୍ତୁତି ପ୍ରଣାଳୀ
ପ୍ରଥମେ ଏକ ପାତ୍ରରେ ସୁଜି, ଘିଅ, ଅଳ୍ପ ଲୁଣ, ପାଣି ପକାଇ ଭଲ ଭାବେ ଚକଟି ଦିଅନ୍ତୁ। ଏହା ପରେ ଗ୍ୟାସ ଲଗାଇ ପାତ୍ର ବସାନ୍ତୁ। ପାତ୍ରରେ କ୍ଷୀର ଫୁଟାନ୍ତୁ। କିଛି ସମୟ ଫୁଟିବା ପରେ ଏଥିରେ ଚିନି , କେଶର, ଗୁଜୁରାତି ଗୁଣ୍ଡ, ବାଦାମ, ପେସ୍ତା ବାଦାମ, କାଜୁ, ପକାଇ ଭଲ ଭାବେ ଫୁଟାଇ ରାବିଡ଼ି ଭଳି ମୋଟା ହେବା ପରେ ଗ୍ୟାସରୁ ଓହ୍ଲାଇ ରଖନ୍ତୁ। ଏହା ପରେ ପ୍ରସ୍ତୁତ କରି ରଖିଥିବା ଦଳାରୁ ବେଲି ପୁରୀ ପ୍ରସ୍ତୁତ କରନ୍ତୁ। ପୁରୀ ପ୍ରସ୍ତୁତ ହେବା ପରେ ଗ୍ୟାସରେ କଡ଼େଇ ବସାଇ ତେଲ ଗରମ କରି ଏହି ପୁରୀକୁ ଛାଣନ୍ତୁ। ଛାଣିବା ପରେ ଏକ ପାତ୍ରକୁ କାଢି ରଖନ୍ତୁ। ଏବେ ଏହି ପୁରୀ ଉପରେ ପ୍ରସ୍ତୁତ କରି ରଖିଥିବା ରାବିଡ଼ିକୁ ପକାନ୍ତୁ। ପ୍ରସ୍ତୁତ ହୋଇଗଲା ରସାବଳୀ।