ଲକ୍ଷ୍ନୌ: ଉତ୍ତର ପ୍ରଦେଶର ପ୍ରୟାଗରାଜରେ ଅନୁଷ୍ଠିତ ମହାକୁମ୍ଭ ଏବେ ଶେଷ ହୋଇଛି, କିନ୍ତୁ ଏହା ବିଷୟରେ ଆଲୋଚନା ଏବେ ବି ଚାଲିଛି। ପ୍ରୟାଗରାଜର ମହାକୁମ୍ଭ କେବଳ ବିଶ୍ୱାସ ଯୋଗୁଁ ଖବରରେ ନଥିଲା, ବରଂ ଏଠାରେ ଏକ ସଫଳତାର କାହାଣୀ ମଧ୍ୟ ସୃଷ୍ଟି ହୋଇଥିଲା। କେହି ନିମ ଗଛର ଛୋଟ ଡାଳ ଖଣ୍ଡ ବିକ୍ରୟ କରି ଲକ୍ଷ ଲକ୍ଷ ଟଙ୍କା ରୋଜଗାର କରିଥିଲେ, କେହି ମାଳ ବିକ୍ରୟ କରି ପ୍ରସିଦ୍ଧ ହୋଇଥିଲେ। ଏହି ସମୟରେ, ଏକ ନାବିକ ପରିବାରର ସଫଳତାର କାହାଣୀ ମଧ୍ୟ ସାମ୍ନାକୁ ଆସିଲା। ଏହି ପରିବାର ମାତ୍ର ଦେଢ଼ ମାସ ଅର୍ଥାତ୍ ୪୫ ଦିନ ମଧ୍ୟରେ କୋଟିପତି ହୋଇଗଲା। ଏହି ପରିବାରର ସଫଳତାର କାହାଣୀ ନିଜେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉତ୍ତର ପ୍ରଦେଶ ବିଧାନସଭାର ବଜେଟ ଅଧିବେଶନ ସମୟରେ ବର୍ଣ୍ଣନା କରିଛନ୍ତି।
ବିଧାନସଭାରେ ଅଭିଭାଷଣ ଦେଇ ମୁଖ୍ୟମନ୍ତ୍ରୀ ଯୋଗୀ କହିଛନ୍ତି ଯେ, ନାବିକ ପରିବାରର ଭାଗ୍ୟ ବଦଳାଇ ଦେଲା ପ୍ରୟାଗରାଜ ମହାକୁମ୍ଭ । ୪୫ ଦିନରେ ପିଣ୍ଟୁ ମାହାର ପରିବାର ରୋଜଗାର କରିଛନ୍ତି ୩୦ କୋଟି । ୨୦୧୯ କୁମ୍ଭ ଅଭିଜ୍ଞତାରୁ ବୋଟ୍ ସଂଖ୍ୟା ୬୦ରୁ ୧୩୦କୁ ବଢ଼ାଇଥିଲେ ପିଣ୍ଟୁ । ପିଣ୍ଟୁ ଓ ତାଙ୍କ ସମ୍ପର୍କୀୟ ପରିବାରର ପ୍ରାୟ ୧୦୦ ଜଣ ଏହି କାମ କରୁଥିଲେ । ମୁଖ୍ୟମନ୍ତ୍ରୀ ଯୋଗୀ କହିଛନ୍ତି ଯେ ପ୍ରୟାଗରାଜର ଏହି ଡଙ୍ଗା ଚାଳକ ପରିବାର ମହାକୁମ୍ଭର ୪୫ ଦିନରେ ୧୩୦ଟି ଡଙ୍ଗା ସହିତ ୩୦ କୋଟି ଟଙ୍କାର ନିଟ୍ ଲାଭ କରିଛନ୍ତି। ଯଦି ଆମେ ପ୍ରତ୍ୟେକ ଡଙ୍ଗାର ହିସାବ ଦେଖିବା, ତେବେ ପ୍ରତ୍ୟେକ ଡଙ୍ଗା ୪୫ ଦିନରେ ପ୍ରତିଦିନ ୫୦ ରୁ ୫୨ ହଜାର ଟଙ୍କା ରୋଜଗାର କରିଥିଲା। ଏହି ଅନୁସାରେ, ନାବିକ ପରିବାର ପ୍ରତିଦିନ ୨୩ ଲକ୍ଷ ଟଙ୍କା ରୋଜଗାର କରିଛନ୍ତି।
