ଭୁବନେଶ୍ଵର: ଦିନକୁ ଦିନ ବଢୁଛି ଖରା । ଆଉ ଏ ସମୟରେ କୋଲ୍ଡ ଡ୍ରିଙ୍କସ୍ ପିଇବା ପାଇଁ ବଢୁଛି ଚାହିଦା । ପିଲାଠୁ ବୟସ୍କ ଯାଏଁ ଏବେ ଅନେକଙ୍କ ହାତରେ କୋଲ୍ଡ ଡ୍ରିଙ୍କ୍ସର ବୋତଲ । ଶୋଷ ମେଣ୍ଟାଇବା ପାଇଁ ଆପଣ କୋଲ୍ଡ ଡ୍ରିଙ୍କସ୍ ପିଉଛନ୍ତି ସତ କିନ୍ତୁ କେବେ ଚିନ୍ତା କରିଛନ୍ତି ଏହି କୋଲଡ ଡ୍ରିଙ୍କସ ଆପଣଙ୍କ ସ୍ୱାସ୍ଥ୍ୟ ଖରାପ କରିପାରେ । ହେଲେ କଣ ଆପଣ ଜାଣନ୍ତି କି ଶରୀର ଉପରେ ବଡ଼ ଧରଣର କୁ-ପ୍ରଭାବ ପକାଇଥାଏ ଏହି କୋଲ୍ଡ ଡ୍ରିଙ୍କ୍ସ ।
ଦିନକୁ ଦିନ ଲୋକଙ୍କର ଖାଦ୍ୟ ଅଭ୍ୟାସ ବଦଳି ଯାଉଛି । ଛୋଟ ଛୋଟ ପିଲାମାନେ ଘର ଖାଦ୍ୟ ବ୍ୟତୀତ ଫାଷ୍ଟଫୁଡ ଖାଇବାକୁ ପସନ୍ଦ କରୁଛନ୍ତି, ତା ସାଙ୍ଗକୁ କୋଲ୍ଡ ଡ୍ରିଙ୍କସ୍ ପିଇବା ଅଭ୍ୟାସ ହୋଇଯାଇଛି । ଏସବୁ କାରଣରୁ ଛୋଟ ବେଳୁ ମେଦବୃଦ୍ଧିର ଶିକାର ହେଉଛନ୍ତି । ତେବେ ସୁସ୍ଥ ଜୀବନ ବଞ୍ଚିବା ପାଇଁ ହେଲେ ଫାଷ୍ଟଫୁଡ ଓ ମୃଦୁ ପାନୀୟଠାରୁ ଦୂରେଇ ରହିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ । କାରଣ ଏଥିରେ ଥିବା ସୁଗାର,କଫିନ୍ ଆଉ ଏସିଡ଼ିକ୍ ତତ୍ତ୍ୱ ଅନେକ ରୋଗର କାରଣ ।
ନ୍ୟାସନାଲ୍ ପ୍ରୋଗ୍ରାମ୍ ଅନ୍ କ୍ଲାଇମେଟ୍ ଚେଞ୍ଜ୍ ଆଣ୍ଡ୍ ହ୍ୟୁମାନ୍ ହେଲ୍ଥ (NPCCHL) କୋଲ୍ଡ ଡ୍ରିଙ୍କ୍ସକୁ ନେଇ ଚେତାବନୀ ଜାରି କରିଛି । ଏହା ବ୍ୟତୀତ ପ୍ରବଳ ଖରା ବା ଗରମରେ ଚା ଏବଂ କଫିକୁ ଅଣଦେଖା କରିବାକୁ ମଧ୍ୟ ପରାମର୍ଶ ଦିଆଯାଇଛି । ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ ଅଧିକ ଗରମ ଲାଗିବା ସମୟରେ କାର୍ବୋନେଟେଡ୍ କୋଲ୍ଡ ଡ୍ରିଙ୍କ୍ସ ପିଇବା ଦ୍ୱାରା ଶରୀରରୁ ଅଧିକ ଝାଳ ବାହାରେ । ଯାହାକି ଶରୀରର ୱାଟର ଲେବଲ୍କୁ କମ୍ କରେ ।
ଏହି ମୃଦୁ ପାନୀୟରେ ଅଧିକ ପରିମାଣର କଫିନ୍ ଏବଂ ଚିନି ଥାଏ, ଯାହାକି ଡିହାଇଡ୍ରେସନ୍ର ମୁଖ୍ୟ କାରଣ । ଅଧିକ ମୃଦୁ ପାନୀୟ ଥକ୍କାପଣ, ମୁଣ୍ଡବିନ୍ଧା ଏବଂ ଦୁର୍ବଳତାର ଆଉ ଏକ କାରଣ । ଯଦି କେହି ପେଟ ସମସ୍ୟା ବା ଆସିଡ଼ିଟିରେ ପୀଡିତ ତେବେ ସେମାନେ କୋଲ୍ଡ ଡ୍ରିଙ୍କ୍ସଠୁ ଦୂରେଇ ରହିବା ନିହାତି ଆବଶ୍ୟକ ।