ନୂଆଦିଲ୍ଲୀ: ନୂଆ ମାସ ଆରମ୍ଭ ହେବା ମାତ୍ରେ କିଛି ନିୟମ ପରିବର୍ତ୍ତନ ହୁଏ। ଯେତେବେଳେ, ପେଟ୍ରୋଲ, ସିଏନଜି, ଏଲପିଜି ଗ୍ୟାସ୍ ଇତ୍ୟାଦିର ମୂଲ୍ୟ ସଂଶୋଧିତ ହୁଏ। ମେ ମାସରେ ମଧ୍ୟ ଅନେକ ପରିବର୍ତ୍ତନ ଘଟିପାରେ ଏବଂ ଏହା ସାଧାରଣ ଲୋକଙ୍କ ବଜେଟକୁ ପ୍ରଭାବିତ କରିପାରେ। ଗ୍ୟାସ ସିଲିଣ୍ଡର ଠାରୁ ଆରମ୍ଭ କରି ସ୍ଥାୟୀ ଜମା ପର୍ଯ୍ୟନ୍ତ ବ୍ୟାଙ୍କ ସେବା ସହିତ ଜଡିତ ପରିବର୍ତ୍ତନ ହୋଇପାରେ। ଆସନ୍ତୁ ଜାଣିବା ମେ ମାସରେ କଣ ପରିବର୍ତ୍ତନ ହେବ ଏବଂ ସାଧାରଣ ଲୋକଙ୍କ ପକେଟ ଉପରେ ଏହାର କେତେ ପ୍ରଭାବ ପଡ଼ିପାରେ?
ଏଟିଏମ ଟ୍ରାଞ୍ଜାକସନ୍ ଶୁଳ୍କରେ ବୃଦ୍ଧି
ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ) ଏବଂ ନ୍ୟାସନାଲ ପେମେଣ୍ଟସ କର୍ପୋରେସନ ଅଫ ଇଣ୍ଡିଆ (ଏନପିସିଆଇ) ଅନୁସାରେ, ୧ ମଇ ୨୦୨୫ରୁ ଏଟିଏମରୁ ନଗଦ ଉଠାଣ ପାଇଁ ମାଗଣା ଟ୍ରାନଜାକସନର ସୀମା ପରେ ଅଧିକ ଶୁଳ୍କ ଦେବାକୁ ପଡ଼ିବ। ବର୍ତ୍ତମାନ ମେଟ୍ରୋ ସହରରେ ନିଜ ବ୍ୟାଙ୍କର ଏଟିଏମରୁ ୫ଟି ଏବଂ ଅନ୍ୟ ବ୍ୟାଙ୍କର ଏଟିଏମରୁ ୩ଟି ମାଗଣା ଟ୍ରାନଜାକସନ ଏବଂ ଅଣ-ମେଟ୍ରୋ ଅଞ୍ଚଳରେ ୫ଟି ମାଗଣା ଟ୍ରାନଜାକସନ ମିଳୁଛି। ଏହି ସୀମା ପରେ ପ୍ରତି ଟ୍ରାନଜାକସନ ପାଇଁ ୨୧ ଟଙ୍କା ଶୁଳ୍କ ଲାଗୁ ହେଉଥିବା ବେଳେ, ଏବେ ଏହା ୨୩ ଟଙ୍କାକୁ ବୃଦ୍ଧି ପାଇବ। ଏକ୍ସରେ ଥିବା କେତେକ ପୋଷ୍ଟ ଅନୁସାରେ, ମାଗଣା ସୀମା ସମ୍ପୂର୍ଣ୍ଣ ଉଠାଇ ଦିଆଯାଇ ପ୍ରତ୍ୟେକ ଟ୍ରାନଜାକସନ ପାଇଁ ୧୯ ଟଙ୍କା ଶୁଳ୍କ ଲାଗୁ ହୋଇପାରେ। ବାଲାନ୍ସ ଯାଞ୍ଚ ପାଇଁ ମଧ୍ୟ ୬ ଟଙ୍କା ବଦଳରେ ୭ ଟଙ୍କା ଶୁଳ୍କ ଲାଗିବ। ଏହି ଶୁଳ୍କ ବୃଦ୍ଧିର କାରଣ ହେଉଛି ଏଟିଏମ ରକ୍ଷଣାବେକ୍ଷଣ ଓ ସୁରକ୍ଷା ଖର୍ଚ୍ଚରେ ବୃଦ୍ଧି।
LPG ଗ୍ୟାସ ସିଲିଣ୍ଡର ଦର
ପ୍ରତି ମାସ ଆରମ୍ଭ ପୂର୍ବରୁ ତୈଳ କମ୍ପାନୀଗୁଡ଼ିକ ଦ୍ୱାରା ଏଲପିଜି ଗ୍ୟାସର ମୂଲ୍ୟ ସଂଶୋଧନ କରାଯାଏ। ଏପରି ପରିସ୍ଥିତିରେ, ଘରୋଇ ଗ୍ୟାସ ଏବଂ ବାଣିଜ୍ୟିକ ଗ୍ୟାସର ଦର ମଧ୍ୟ ସଂଶୋଧନ କରାଯାଏ ଏବଂ ଏହା ପରେ, ମାସର ପ୍ରଥମ ତାରିଖରେ ଗ୍ୟାସର ମୂଲ୍ୟରେ ବୃଦ୍ଧି କିମ୍ବା ହ୍ରାସ ଦେଖାଯାଏ। ତଥାପି, ପ୍ରତ୍ୟେକ ଥର ହାର ଅଧିକ କିମ୍ବା କମ୍ ହେବା ଜରୁରୀ ନୁହେଁ। ଏପ୍ରିଲରେ ସିଲିଣ୍ଡରର ମୂଲ୍ୟ ୫୦ ଟଙ୍କା ବୃଦ୍ଧି କରାଯାଇଥିଲା।
ଭାରତୀୟ ରେଳବାଇରେ ପରିବର୍ତ୍ତନ
ଭାରତୀୟ ରେଳବାଇ ଟିକେଟ ବୁକିଂ ସମ୍ବନ୍ଧୀୟ ପରିବର୍ତ୍ତନ ହୋଇପାରେ। ମେ ମାସରୁ ରେଳ ଯାତ୍ରୀଙ୍କ ପାଇଁ ଟିକେଟ୍ ସମ୍ବନ୍ଧୀୟ ପରିବର୍ତ୍ତନ ହେବ। ୱେଟିଂ ଟିକେଟ୍ ଥିବା ଯାତ୍ରୀମାନେ ସ୍ଲିପର୍ ଏବଂ ଏସି କୋଚ୍ରେ ଯାତ୍ରା କରିପାରିବେ ନାହିଁ।
ଏଫଡି ଏବଂ ସଞ୍ଚୟ ଖାତାରେ ପରିବର୍ତ୍ତନ
ଯଦି ଆପଣଙ୍କର ଏଫଡି କିମ୍ବା ସେଭିଂ ବ୍ୟାଙ୍କ ଆକାଉଣ୍ଟ ଅଛି, ତେବେ ଜାଣିରଖନ୍ତୁ ଯେ ୧ ମେ ଠାରୁ ଋଣ ସମ୍ବନ୍ଧୀୟ ପରିବର୍ତ୍ତନ ହୋଇପାରେ। ପ୍ରକୃତରେ, ଆରବିଆଇ ଦ୍ୱାରା ରେପୋ ହାର ଲଗାତାର ଦୁଇଥର ହ୍ରାସ କରାଯାଇଛି। ଏପରି ପରିସ୍ଥିତିରେ, FD କିମ୍ବା ସଞ୍ଚୟ ଆକାଉଣ୍ଟରୁ ନିଆଯାଇଥିବା ଋଣର ସୁଧ ହାର ପ୍ରଭାବିତ ହୋଇପାରେ। ଅନେକ ବ୍ୟାଙ୍କ ଦ୍ୱାରା ଋଣ ସୁଧ ହାର ପରିବର୍ତ୍ତନ କରାଯାଇଛି।
ଗ୍ରାମୀଣ ବ୍ୟାଙ୍କଗୁଡ଼ିକରେ ମଧ୍ୟ ପରିବର୍ତ୍ତନ
ଗ୍ରାମୀଣ ବ୍ୟାଙ୍କଗୁଡ଼ିକରେ ପରିବର୍ତ୍ତନ ଦେଖାଯାଇପାରେ। RBI ରାଜ୍ୟର ସମସ୍ତ ସ୍ଥାନୀୟ ବ୍ୟାଙ୍କକୁ ଏକାଠି ମିଶ୍ରଣ କରି ଏକ ବଡ଼ ବ୍ୟାଙ୍କ ଗଠନ କରିବ। ବିଭିନ୍ନ ଗ୍ରାମୀଣ ବ୍ୟାଙ୍କକୁ ଗୋଟିଏ ବଡ଼ ବ୍ୟାଙ୍କରେ ପରିଣତ କରିବାର ଯୋଜନା ରହିଛି। ଦେଶର ୧୧ଟି ରାଜ୍ୟରେ ଗ୍ରାମୀଣ ବ୍ୟାଙ୍କକୁ ଏକ ବଡ଼ ବ୍ୟାଙ୍କ କରାଯିବ।
