ଇସଲାମାବାଦ : ଭାରତର ବହୁ ଚର୍ଚ୍ଚିତ ଆତଙ୍କବାଦୀ ଶାହିଦ ଲତିଫଙ୍କୁ ଗୁଳି କରି ହତ୍ୟା କରାଯାଇଛି। ସେ ପାକିସ୍ତାନରେ ଲୁଚି ରହିଥିଲେ। ଅଜ୍ଞାତ ଆକ୍ରମଣକାରୀମାନେ ତାଙ୍କୁ ଗୁଳି କରି ଘଟଣାସ୍ଥଳରେ ହତ୍ୟା କରିଛନ୍ତି । ଶାହିଦ ଲତିଫ ପଠାନକୋଟ ଆକ୍ରମଣର ମାଷ୍ଟରମାଇଣ୍ଡ ଥିଲେ।
ଶାହିଦ ଲତିଫ ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦଙ୍କ ଆତଙ୍କବାଦୀ ଥିଲେ। ସେ ପାକିସ୍ତାନର ସିଆଲକୋଟରେ ଲୁଚି ରହିଥିଲେ। ବୁଧବାର ଦିନ ଅଜ୍ଞାତ ଆକ୍ରମଣକାରୀମାନେ ତାଙ୍କୁ ଗୁଳି କରିଥିଲେ। ସେ ଜୈଶ-ଏ-ମହମ୍ମଦଙ୍କର ଜଣେ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ। 12 ନଭେମ୍ବର 1994 ରେ ଲତିଫଙ୍କୁ ଭାରତରେ ଗିରଫ କରାଯାଇଥିଲା। ତାଙ୍କୁ 16 ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା। ଜେଲ ଦଣ୍ଡ ଭୋଗିବା ପରେ ଲତିଫଙ୍କୁ 2010 ରେ ୱାଗା ମାଧ୍ୟମରେ ପାକିସ୍ତାନ ପଠାଯାଇଥିଲା।
ଭାରତ ସରକାର ଲତିଫଙ୍କୁ ଆତଙ୍କବାଦୀ ଘୋଷଣା କରିଥିଲେ। ବେଆଇନ କାର୍ଯ୍ୟକଳାପ (ପ୍ରତିରୋଧ) ଅଧିନିୟମ (UAPA) ଅଧୀନରେ ତାଙ୍କୁ ଏକ ମାମଲା ରୁଜୁ କରାଯାଇଥିଲା। ଏନଆଇଏ (ଜାତୀୟ ଅନୁସନ୍ଧାନ ଏଜେନ୍ସି) ତାଙ୍କୁ ଖୋଜୁଥିଲା। ଜେଲ ଦଣ୍ଡ ଭୋଗିବା ପରେ ମଧ୍ୟ ସେ ଆତଙ୍କବାଦ ପଥ ଛାଡି ନାହାଁନ୍ତି। ସେ 2 ଜାନୁଆରୀ 2016 ରେ ପଠାନକୋଟ ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ଥିଲେ। ସେ ସିଆଲକୋଟରେ ବସି ଏହି ଆକ୍ରମଣ କରିଥିଲେ। ଏଥିପାଇଁ ସେ ଜୈଶ-ଏ-ମହମ୍ମଦର ଚାରିଜଣ ଆତଙ୍କବାଦୀଙ୍କୁ ପଠାନକୋଟକୁ ପଠାଇଥିଲେ। 1999 ଇଣ୍ଡିଆନ୍ ଏୟାରଲାଇନ୍ସ ବିମାନ ଅପହରଣ ମାମଲାରେ 41 ବର୍ଷିୟ ସହିଦ ଲତିଫ ମଧ୍ୟ ଅଭିଯୁକ୍ତ ଥିଲେ।
