ନୂଆଦିଲ୍ଲୀ: ଜମ୍ମୁ-କାଶ୍ମୀରର ରିଆସି ଜିଲ୍ଲାରେ ଶ୍ରୀ ମାତା ବୈଷ୍ଣୋଦେବୀ ମାର୍ଗରେ ନକଲି କାଗଜପତ୍ର ବ୍ୟବହାର କରି ନିଜକୁ ପୋନି ସେବା ପ୍ରଦାନକାରୀ ବୋଲି ପରିଚୟ ଦେବା ଅଭିଯୋଗରେ ଦୁଇ ଜଣଙ୍କ ବିରୁଦ୍ଧରେ ଏକ ମାମଲା ରୁଜୁ କରାଯାଇଛି। ଅଧିକାରୀମାନଙ୍କ କହିବା ଅନୁସାରେ, ଶ୍ରୀ ଗୀତା ମାତା ମନ୍ଦିର ନିକଟରେ ନିୟମିତ ପାଟ୍ରୋଲିଂ ସମୟରେ, ପୋଲିସ ଜଣେ ବ୍ୟକ୍ତିଙ୍କୁ ଅଟକାଇଥିଲେ ଯିଏ ନିଜକୁ ପୁରନ ସିଂହ ବୋଲି ପରିଚୟ ଦେଇଥିଲେ । କିନ୍ତୁ କଡ଼ା ଜେରା ପରେ ଜଣାପଡିଥିଲା ଯେ ତାଙ୍କ ନାମ ମନିର ହୁସେନ।
ପୋଲିସର କହିବା ଅନୁସାରେ, ବେଆଇନ କାମ କରିବା ପାଇଁ ଅନ୍ୟ କାହାର ଅଧିକୃତ ସେବା କାର୍ଡ ବ୍ୟବହାର କରୁଥିଲେ ଉକ୍ତ ବ୍ୟକ୍ତି ଜଣଙ୍କ। ଏନେଇ କଟରା ଥାନାରେ ଏକ ଏଫଆଇଆର ରୁଜୁ କରାଯାଇଛି। ବନ ଗଙ୍ଗା ସେତୁ ନିକଟରେ, ପୋଲିସ ଜମ୍ମୁ ଜିଲ୍ଲାର କୋଟଲିର ବାସିନ୍ଦା ସାହିଲ ଖାନଙ୍କୁ କୌଣସି ବୈଧ ଲାଇସେନ୍ସ ବିନା ପୋନି ସେବା ପ୍ରଦାନକାରୀ ଭାବରେ କାର୍ଯ୍ୟ କରିବା ଅଭିଯୋଗରେ ଗିରଫ କରିଛି।
ଗିରଫ ପରେ ଉକ୍ତ ବ୍ୟକ୍ତି ଜଣଙ୍କ ବିନା କୌଣସି ଲାଇସେନ୍ସରେ ସେଠାରେ କାମ କରୁଥିବା ନେଇ ସ୍ୱୀକାର କରିଛି । ପୋଲିସର କହିବା ଅନୁସାରେ ସାହିଲ ବିରୋଧରେ ଏକ ମାମଲା ରୁଜୁ କରାଯାଇଛି। ତେବେ ମନ୍ଦିର ମାର୍ଗରେ ଅନଧିକୃତ କାର୍ଯ୍ୟକଳାପକୁ ରୋକିବା ପାଇଁ ତଦାରଖ ଏବଂ ଯାଞ୍ଚ ଅଭିଯାନ ଜାରି ରହିବ ବୋଲି ଅଧିକାରୀମାନେ କହିଛନ୍ତି। ପୋଲିସ ସମସ୍ତ ସେବା ପ୍ରଦାନକାରୀଙ୍କୁ ସେମାନଙ୍କ ପାଖରେ ବୈଧ କାଗଜପତ୍ର ରଖିବାକୁ ଅପିଲ୍ କରିଛି ଏବଂ ଯେକୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ରିପୋର୍ଟ କରିବାକୁ ଲୋକଙ୍କୁ ଅନୁରୋଧ କରିଛି।
ସୂଚନାଯୋଗ୍ୟ, ଜମ୍ମୁ କାଶ୍ମୀରର ପହଲଗାମରେ ପର୍ଯ୍ୟଟକଙ୍କ ଉପରେ ଆତଙ୍କବାଦୀ ଆକ୍ରମଣ ପରେ ଗୁଜରାଟର ପ୍ରମୁଖ ଧାର୍ମିକ ସ୍ଥଳ ଯେପରିକି ସୋମନାଥ ମନ୍ଦିର, ଦ୍ୱାରକାଧୀଶ ମନ୍ଦିର ଏବଂ ଅମ୍ବାଜୀ ମନ୍ଦିରରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି। ପ୍ରତିଦିନ ହଜାର ହଜାର ଭକ୍ତ ଏହି ମନ୍ଦିରଗୁଡ଼ିକୁ ପରିଦର୍ଶନ କରନ୍ତି। ରାଜକୋଟ ରେଞ୍ଜ ଇନ୍ସପେକ୍ଟର ଜେନେରାଲ ଅଶୋକ କୁମାର ଯାଦବ କହିଛନ୍ତି ଯେ ଗୁଜରାଟ ପାକିସ୍ତାନ ନିକଟତର ହୋଇଥିବାରୁ, ଉପକୂଳରେ ଥିବା ପୋଲିସକୁ ସତର୍କ କରାଯାଇଛି। ଗୁଜୁରାଟ ପଡ଼ୋଶୀ ଦେଶ ସହିତ ସାମୁଦ୍ରିକ ଏବଂ ସ୍ଥଳ ସୀମା ବାଣ୍ଟିଥାଏ।
